Inson hayoti davomida turli xil sinovlar mavjud bo‘lar ekan, bu sinovlarning ham muayyan ma’noda o‘ziga xos yaxshi jihatlari hamda bajarilishi lozim bo‘lgan vazifalar uchun kuch berayotgani ba’zan ko‘zimizga tashlanib qoladi. Dunyo aholisini tashvishga solib kelayotgan koronavirus infeksiyasining yurtimizga kirib kelishi natijasida e’lon qilingan karantin ham ana shunday jihatlaridan birini namoyon qilmoqda. Karantin odamlarni maqsadsiz ko‘chaga chiqmaslikka, zaruratsiz harakat qilmaslikka undashi bilan bir vaqtda yurtimizda raqamli texnologiyalardan foydalanishni barcha sohalarda jadallashtirishni zaruratga aylantirib ulgurdi. Yurtimizda koronavirus infeksiyasi tarqalib ketishining oldini olish maqsadida zaruriy ehtiyojsiz ko‘chaga chiqishni, ishga, o‘qishga borishni hamda boshqa shu kabi faoliyatlarni vaqtincha amalga oshirmaslik aytilmoqda. Bu esa, o‘z navbatda, masofaviy faoliyatni talab qilmoqda. Bunday vaziyatda, raqamlashtirilgan texnologiyalarni amaliyotga keng tatbiq etish, ularning samarali jihatlaridan foydalanish ehtiyoji hozirgi kunlarda ayniqsa har doimgidan ham faollashgani barchamizga ma’lum. Muhtaram yurtboshimizning Parlamentga qilgan murojaatlarida ta’kidlaganlaridek, raqamlashtirilgan texnologiyalardan unumli foydalanish ehtiyoji kundan kun ortib bormoqda, hozir esa ushbu holat yanada kuchaygan. Bu yurtimizda karantin davrida raqamli texnologiyalardan foydalanishni jadallashtirib yubordi. Biz buni to’g’ri anglab yetgan holda 2020-yilning dastlabki choragida raqamli sohada katta o‘zgarishlar qila oldik, o‘ziga xos kashfiyotlarni amalga oshirdik. O’zbekistonda raqamli texnologiyalarni muayyan sohalarda joriylashtirishda, muayyan sohalarda esa rivojlantirishda o‘ziga xos tezlikni amalga oshirdik. Jumladan, avvalo, Davlat xizmatlarining elektron tartibda amalga oshiriladigan xizmat turlari yanada kengaytirildi. Shuningdek, davlat idoralari, tashkilotlari, muassasalari, nodavlat notijorat tashkilotlarning ham faoliyat yuritishida masofaviy faoliyat olib borish hajmi oshirildi. Ayni kunlarda xizmatchilar, ishchilar o‘z funksiyalarini uydan turgan holda amalga oshirmoqdalar. Bundan tashqari, ta’lim sohasida masofaviy ta’limning yurtimiz bo‘ylab mutlaq tarzda joriy qilinganligi ushbu sohada o‘ziga xos dadil “qadam” bo‘ldi deb ta’rif bersak arziydi. Ijtimoiy sohada ham xizmatning online rejimdagi turlarining jadallashganligini e’tirof etishimiz lozim.
Karantin yurtimizda raqamli texnologiyalardan foydalanishni jadallashtirib yuborgan o’ziga xos turtki, g‘oyibona kuchga aylandi. Yurtimizning buyuk, mehnatkash xalqi har qanday sinovli kunlarda ham O‘zbekistonimizning rivojlanishi borasida dadil qadamlar tashlamoqda. Biz ana shijoatga boy xalqmiz!
(c) Abdulhayjon Azamov
Fikr bildirish